نئی دہلی (این این آئی)پاکستان کے ساتھ فوجی مشقوں پر روس نے کیا جواب دیا؟بھارتی سیکرٹری خارجہ کے جواب نے نیاعالمی منظر نامہ واضح کردیا،پاک روس فوجی مشقوں پر واویلا کرنے والے بھارت میں جب روسی صدر ولادی میر پیوٹن پہنچے تو بھارتیوں کی زبان لڑ کھڑا گئی ۔نریندر مودی اور ولادی میر پیوٹن کی ملاقات پر بریفنگ دیتے ہوئے سیکرٹری خارجہ جے شنکر پا ک روس فوجی مشقوں کے سوال پر جواب ہی نہ دے سکے ۔بھارتی سیکرٹری خارجہ جے شنکر نے بتا یا کہ نریندر مودی نے اڑی واقعے پر روس کی مذمت کا شکریہ ادا کیا اس موقع پر صحافی نے پاک روس فوجی مشقوں پر بھارتی تحفظات کا معاملہ اٹھانے کے حوالے سے سوال کیا تو جے شنکرنے کنی کتراتے ہوئے اس سوال کا رخ موڑ دیا اور کہا کہ روس سے علاقائی تعاون اور انسداد دہشت گردی کے حوالے سے بات ہوئی ۔