نئی دہلی(مانیٹرنگ ڈیسک)بھارت میں بالی ووڈ کے محمود فاروقی نامی ایک فلم ساز کو ایک امریکی خاتون اسکالر کے ساتھ جنسی زیادتی کے جرم میں سات سال قید کی سزا سنا دی گئی ہے۔ مجرم نے گزشتہ برس نئی دہلی میں اس خاتون کو ریپ کیا تھا۔بھارتی ٹی وی کے مطابق اس جرم کا نشانہ بنننے والی خاتون کے وکیل نے بتایا کہ محمود فاروقی کو یہ سزا ایک بھارتی عدالت نے سنائی۔بھارتی دارالحکومت میں اس مقدمے کی تیز رفتار سماعت کرنے والی ایک عدالت اس واقعے میں ملزم محمود فاروقی کو پہلے ہی قصور وار قرار دے چکی تھی۔
کارروائی میں محمود فاروقی کے لیے سزا کا اعلان کرتے ہوئے عدالت نے اسے سات سال کی سزائے قید کا حکم سنایا۔اس مقدمے میں درخواست دہندہ امریکی اسکالر نے کہا تھا کہ وہ اپنے تحقیقی کام کے دوران محمود فاروقی کو اس کے گھر پر ملی تھی، جس دوران وہ نشے کی حالت میں اس کے ساتھ جنسی زیادتی کا مرتکب ہوا تھا۔اس واقعے کے بعد محمود فاروقی نے اس خاتون کو لکھی گئی ای میلز میں اس سے اپنے اس عمل کی معافی بھی مانگی تھی۔ یہی ای میلز بعد میں استغاثہ کی طرف سے فاروقی کے خلاف ثبوت کے طور پر عدالت میں پیش کر دی گئی تھیں۔