اسلام آباد(نیوز ڈیسک) امریکا نے طالبان کو ایک بار پھر افغان حکومت کے ساتھ قیام امن کے حوالے سے ہونے والے مذاکرات میں شامل ہونے کی پیشکش کرتے ہوئے کہا ہے کہ ان کے افغانستان میں قیام امن کا یہ سنہری موقع ہے۔امریکی محکمہ خارجہ کے ترجمان مارک ٹونر کا واشنگٹن میں پریس بریفنگ دیتے ہوئے کہنا تھا کہ ملا عمر کی ہلاکت کے بعد طالبان اور افغان حکومت کے درمیان مذاکرات پر کوئی اثر نہیں پڑے گا، مذاکراتی عمل طالبان کے پاس سنہری موقع ہے کہ وہ قیام امن کی کوششوں میں افغان حکومت کا ساتھ دیں اور ہم سمجھتے ہیں کہ یہ مصالحت کے لیے سب سے بہتر وقت ہے اور اسے ایک اہم موقع سمجھتے ہوئے آگے بڑھنا چاہیئے۔مارک ٹونر نے کہا کہ اب طالبان کو یہ فیصلہ کرنا ہے کہ انھیں جنگ جاری رکھنی ہے یا پھر افغانستان میں امن کے لئے اپنا کردار ادا کرنا ہے۔ انھوں نے کہا کہ افغان حکومت اور طالبان کے درمیان مذاکرات میں پاکستان نے بہت معاونت کی ہے اور امریکا چاہتا ہے کہ امن میں مذاکرات میں پاکستان اپنا تعمیری کردار ادا کرتا رہے۔ دوسری جانب ملا عمر کی ہلاکت کی خبر سامنے آنے کے بعد افغان طالبان نے آج پاکستان میں ہونے والے مذاکرات کا دوسرا دور ملتوی کردیا ہے۔