اسلام آباد(نیوز ڈیسک) سعودی عرب اور فرانس کے درمیان 12 ارب ڈالر سے زائد کے دفاعی معاہدے ہوئے ہیں۔غیر ملکی خبر رساں ادارے کے مطابق سعودی وزیرِ خارجہ عدل الجبیر کا اپنے فرانسیسی ہم منصب لورینٹ فیبیئس کے ساتھ پریس کانفرنس کرتے ہوئے کہنا تھا کہ دونوں ممالک کے درمیان 12 ارب ڈالر سے زائد کے دفاعی معاہدے طے پا گئے ہیں جس میں ایئر بس جیٹس، ایچ 145 ہیلی کاپٹرز اور دیگر دفاعی سامان بھی شامل ہے۔اس موقع پر فرانسیسی وزیرِخارجہ کا کہنا تھا کہ سعودی عرب کے ساتھ 10 معاہدے ہوئے ہیں جس کے تحت 50 کروڑ ڈالر مالیت کے 50 ایئربس جیٹس اور 23 عدد H145 ہیلی کاپٹر فروخت کئے جائیں گے۔ ان کا کہنا تھا کہ معاہدوں کی سب سے اہم بات سعودی سرزمین پر 2 ایٹمی بجلی گھروں کی تعمیر کا جائزہ لینا بھی ہے جن کے لیے فرانس مکمل معاونت فراہم کرے گا۔