اسلام آباد(نیوز ڈیسک)بھارتی ریاست مدھیہ پردیش میں انجینئر نے ایڈز میں مبتلا بیوی اور دو بیٹیوں کو زندہ جلادیا ۔ میڈیا رپورٹ کے مطابق پولیس نے انجینئر کا نام بتائے بغیر کہاکہ انجینئر نے خود اپنا اور بیوی کا ایچ آئی وی ٹیسٹ پازٹیو آنے کے بعد 9 اور 2 سال کی بیٹیوں کا بھی ایچ آئی وی ٹیسٹ کروایا جو کہ پازیٹو نکلا۔ گرفتاری دینے والے انجینئر نے پولیس کو بتایاکہ اس نے 39 سالہ بیوی کے ہمراہ ملکر بچوں سمیت خودکشی کے ارادہ سے کار کو آگ لگانے کا منصوبہ بنایا اور آبائی گاﺅں سے واپسی پر ملتائی کے قریب علاقہ گانا پور کے قریب کار روک کر پٹرول چھڑک کر آگ لگا دی۔ بیوی نے التجا کی کہ کار میں دونوں بچیوں کو بچا لیا جائے جن کا اس انفیکشن میں ہمارے مبتلا ہونے میں کوئی قصور نہیں تاہم اسی دوران شعلے زیادہ بلند ہونے کے باعث انھیں نہ بچایا جا سکا۔