بیونس(مانیٹرنگ ڈیسک) آئرس ارجنٹائن کے 22 سالہ نوجوان نے مائیکل جیکسن بننے کے لیے 42 لاکھ روپے کی خطیر رقم خرچ کرکے 11 پلاسٹک سرجریاں کرالیں۔ ڈیلی میل کی رپورٹ کے مطابق ارجنٹینا کے 22 سالہ نوجوان لیو بلان کو نے مائیکل جیکسن جیسا نظر آنے کے لیے 30 ہزار ڈالر (42 لاکھ پاکستانی روپے) خرچ کرکے چہرے کی 11 پلاسٹک سرجریاں کرا ڈالیں۔

رپورٹ کے مطابق لیو بلان کو نے مائیکل جیکسن کے گانے کی کچھ ویڈیو دیکھیں اور ان کے مداح ہوگئے، صرف 15 برس کی عمر میں 22 سالہ نوجوان نے پہلی سرجری کرائی۔ رپورٹ کے مطابق 15 برس کی عمر میں پہلی سرجری کرانے کے بعد انہوں نے 11 سرجریاں اور کرائیں تاکہ وہ بالکل مائیکل جیکسن جیسا نظر آسکیں۔ لیو بلان کو متعدد کاسمیٹکس پروڈکٹس بھی استعمال کرتے ہیں تاکہ ہر صورت میں ان کی شکل اور انداز مائیکل جیکسن جیسا لگے اور اس میں کوئی فرق واضح نہ ہو۔ ارجنٹینا کے نوجوان کے مطابق وہ اب تک چہرے، ناک، ٹھوڑی کی ہڈی جیسے کئی چہرے کے نقوش کی سرجری کرواچکے ہیں اور اس عمل میں 30 ہزار ڈالر سے زائد رقم خرچ ہوئی ہے۔ تصاویر میں دیکھا جاسکتا ہے کہ لیو سرجری کرانے کے بعد بالکل مائیکل جیکسن جیسے دکھائی دے رہے ہیں اور ان کا مائیکل جیکسن بننے کا خواب پورا ہوگیا ہے۔ لیو کو دیکھ کر بہت سے لوگ حیران رہ جاتے ہیں لیکن ان کے اہل خانہ اس رویے سے بہت پریشان ہیں اور ان کی والدہ چہرہ بدلنے پر ان سے ناراض بھی ہیں۔