فیصل آباد (مانیٹرنگ ڈیسک) صوبہ پنجاب کی یونیورسٹی آف ایگریکلچر فیصل آباد نے اعلان کیا ہے کہ وہ اگلے ماہ 14 فروری کو ویلنٹائنز ڈے کو بہنوں کے دن کے طور پر منائیں گے۔ یونیورسٹی کے وائس چانسلر ڈاکٹر ظفر اقبال رندھاوا کی جانب سے کیے جانے والے اس اعلان میں کہا گیا ہے کہ ہماری اپنی ثقافت و روایات بہت زرخیز ہیں، مغربی ثقافت میں رنگنے کے بجائے ہم اس دن کو

بہنوں کے دن کے طور پر منائیں گے۔ انہوں نے کہا کہ اس دن طالبات کو اسکارفس، شال اور گاؤن تحفتاً دیے جائیں گے جن پر یونیورسٹی کا نام لکھا ہوگا۔ وائس چانسلر کا کہنا تھا کہ ہماری ثقافت میں خواتین بطور بہن، ماں، بیٹی اور بیوی بہت زیادہ خود مختار ہیں۔ انہوں نے کہا کہ ہم اپنی ثقافت کو بھول رہے ہیں اور مغربی ثقافت کو اپنے اوپر حاوی کر رہے ہیں۔ ’ایسی قومیں جو اپنی ثقافت بھلا دیں جلد اپنا نشان کھو بیٹھتی ہیں‘۔ وائس چانسلر کا مزید کہنا تھا کہ اپنی ثقافت کی حفاظت دنیا میں اپنی پہچان اور عظمت کو برقرار رکھنے کے لیے ضروری ہے، اور نوجوان اس سلسلے میں اہم کردار ادا کرسکتے ہیں۔ انہوں نے یونیورسٹی کے کلاک ٹاور کے نزدیک ’آئی لو ۔ یو اے ایف‘ کے ماڈل کا افتتاح بھی کیا۔ خیال رہے کہ پاکستان میں ویلنٹائن ڈے ہر سال تنازعے کا شکار ہوجاتا ہے۔ اس دن پھولوں اور غباروں کی دکانوں پر کریک ڈاؤن کیے جانا، ڈبل سواری پر پابندی عائد کرنا اور تفریحی مقامات پر عوام کا داخلہ بند کیے جانا عمومی بات ہے۔ اس روز کچھ افراد ’حیا ڈے‘ بھی مناتے ہیں جن کے خیال میں حیا ڈے منانے سے ملک میں شرم و حیا کو فروغ دیا جاسکتا ہے۔