کینبرا(مانیٹرنگ ڈیسک) آسٹریلیا کے علاقے نیو ساؤتھ ویلز میں پیراگلائیڈنگ کے لیے جانے والے سیاحوں کے ساتھ ہولناک واقعہ پیش آیا جس میں کوئی نقصان نہیں ہوا۔ تفصیلات کے مطابق آسٹریلیا کے شمالی علاقے جنوبی ساؤتھ ویلز میں مقامی شہری پیرا شوٹ سے فضاء میں
اڑنے کا مظاہرہ کے لیے بلند و بالا پہاڑ پر پہنچے تو اُن کے ساتھ یہ واقعہ پیش آیا۔ ایک پیراگلائیڈر اپنے جسم سے پیرا شوٹ باندھ ہی رہاتھا کہ اسی دوران تیز ہوا کا بگولا آگیا جس کے بعد بھگدڑ مچ گئی۔ پیرا گلائیڈر کی اہلیہ اتفاق سے ویڈیو بنا رہی تھیں جو بعد میں انٹرنیٹ پر وائرل ہوئی۔ ویڈیو میں دیکھا جاسکتا ہے کہ پیرا گلائیڈر ابھی اپنے جسم سے پیرا شوٹ باندھ ہی رہا تھا کہ اچانک ہوا کے بگولے نے اُسے لپیٹ میں لے لیا جس کے بعد پیرا شوٹ مین فضاء میں پرواز کرنے لگا۔ پیراگلائیڈر نے فضاء میں اڑتے ہی خود کو سنبھالا اور نیچے بیٹھے لوگ اپنے آپ کو محفوظ رکھنے کے لیے سامان اکھٹا کر کے بھاگنے لگے۔ مقامی میڈیا کی رپورٹ کے مطابق مذکورہ واقعہ زمین سے چالیس ہزار فٹ کی بلندی پر واقع بوڑھا پہاڑ پر پیش آیا۔ بگولے کی زد میں آنے والا پیراگلائیڈر پندرہ منٹ فضاء میں اڑنے کے بعد باحفاظت اترا جس کے بعد اُسے اسپتال منتقل کیا گیا جہاں ڈاکٹرز نے مختلف ایکسرے کیے۔ ڈاکٹرز کے مطابق پیراگلائیڈر کا نام رابرٹ ہے جس کے پٹھوں میں کھچاؤ پیدا ہوگیا البتہ کوئی بڑا نقصان نہیں ہوا۔
