برن (این این آئی)سوئس عدالت نے 71سالہ پڑدادی اور اس کے 21سالہ منگیتر کے درمیان شادی کو غیر قانونی قرار دے دیا ۔برطانوی اخبار کے مطابق 71سالہ سوئس بوڑھیا اور اس کے تیونس سے 21سالہ منگیتر کا دعویٰ ہے کہ وہ دونوں ریپ میوزک کے دیوانے ہیں تاہم سوئس عدالت نے ان کے دعویٰ کے باوجود انہیں شادی کی اجازت دینے سے انکار کردیا ہے ۔سوئٹزرلینڈکی ووڈکنٹونل کورٹ نے ماننے سے انکار کر دیا ہے کہ جوڑا ایک دوسرے کی محبت میں گرفتار ہے ۔ سوئس عدالت نے وضاحت کرتے ہوئے کہا ہے کہ ان دونوں کی اکٹھے ہونے کی خواہش محض دھوکہ دہی ہے اور قرار دیا ہے کہ 21سالہ تیونسی لڑکا صرف سوئٹزرلینڈ میں رہنا چاہتا ہے ۔تاہم سوئس پنشنر کا کہنا ہے کہ وہ اپنے بوائے فرینڈ سے اس وقت انٹرنیٹ پر ملی جب وہ 18برس کا تھا ۔71سالہ بوڑھی خاتون نے زور دیا کہ اس نے یہ محسوس کیا ہے کہ وہ ہی اس کا سچا جانی ہے اور اس سے روح کا تعلق ہے ۔ 71سالہ سوئس خاتون نے مزید کہا کہ ہم دونوں ریپ پسند کرتے ہیں ،مضافاتی علاقے میں پیدل سیر کو جاتے ہیں ، ہمارے خیالات ایک جیسے ہیں ۔واضح رہے کہ خاتون اپنے منگیتر سے ملنے کے لئے گزشتہ برس پانچ روز کے لئے تیونس بھی جا چکی ہے جہاں سوئس خاتون نے اپنے 21سالہ منگیتر کے اہل خانہ سے بھی ملاقات کی ۔ 71سالہ سوئس خاتون اور 21سالہ لڑکے نے تب شادی کرنے کے لئے تیونس میں سوئس سفیر کو درخواست بھی جمع کروا دی تھی