بیجنگ(نیوز ڈیسک)چین کے جنوب مغربی شہر چینگدو میں ایسے کوڑا دان متعارف کروائے جا رہے ہیں جن میں وائی فائی نصب ہوگا۔چائنہ ریڈیو انٹرنیشنل کے مطابق صوبہ سیچوان کے شہر چینگدو میں یہ کوڑا دان اسی ماہ کے اواخر میں شہر میں نصب کیے جائیں گے۔ان کوڑا دانوں سے نہ صرف بلا معاوضہ انٹرنیٹ تک رسائی حاصل ہوسکے گی بلکہ اس کے اوپر والے حصے پر دو شمسی توانائی کے پینلز بھی نصب ہوں گے اور اس سے بننے والی بجلی کوٍڑا دان کی نیچے لگائی گئی بیٹریوں میں محفوظ ہوگی۔یہ کوڑا دان کوڑے اکٹھا کرنے اور اس کو ٹھکانے لگانے کے حوالے سے بھی کام کرے گا۔ ان میں نصب جی پی ایس گلیوں کی صفائی کرنے والوں کو مطلع کرے گا کہ کوڑا اٹھانے کا وقت ہوچکا ہے۔صرف یہی نہیں بلکہ یہ کوڑا دان آگ اور بم پروف بھی ہوں گے۔جیسے ہی کوئی شخص ان کوڑا دانوں کے قریب جائے گا یہ خود بخود کھل جائیں گے اور ان کے اندر بدبو ختم کرنے کا خودساختہ نظام بھی موجود ہوگا۔مقامی میڈیا کے مطابق مقامی افراد نے اسے پہلے ہی کنگ کونگ کا نام دے دیا ہے۔ہوشی میٹروپولس ڈیلی کے مطابق ‘پانچ ملی میٹر چوڑی سٹین لس سٹیل پلیٹس اور چار تہوں والے ڈیزائن سے آراستہ، اس کا واقعی یہی نام ہوسکتا ہے۔‘