اسلام آباد (نیوز ڈیسک)ماہرین کا کہنا ہے کہ کھیرا نیند کے مسائل میں کمی لانے میں مددگار ثابت ہو سکتا ہے۔ برطانیہ کی ایبرسٹ وِتھ یونیورسٹی سے تعلق رکھنے والے ڈاکٹر رابرٹ نیش اور ان کے محققین کی ٹیم نے ایک تحقیق میں دریافت کیا ہے کہ کھیرا Q Actin نامی ایک خاص جزو پر مشتمل ہوتا ہے، جو نہ صرف جسم میں سوزش کو کم کرتا ہے بلکہ میلاٹونن ہارمون کی مقدار بھی بڑھا سکتا ہے۔

میلاٹونن وہ ہارمون ہے جو انسان کے نیند کے نظام کو متوازن رکھنے میں اہم کردار ادا کرتا ہے۔ڈیلی اسٹار کی رپورٹ کے مطابق، تحقیق میں شامل رضاکاروں کو روزانہ 20 ملی گرام Q Actin مسلسل بارہ ہفتوں تک دیا گیا۔ نتائج سے معلوم ہوا کہ ان کی نیند کے معیار میں نمایاں بہتری آئی۔ مزید برآں، یہ مرکب یادداشت، دماغی صحت، اور جوڑوں کے درد جیسے مسائل میں بھی مفید پایا گیا۔

اسی رپورٹ میں چین میں کی گئی ایک علیحدہ تحقیق کا بھی ذکر کیا گیا ہے، جس میں بتایا گیا کہ اگر لوگ ہفتے کے آخر میں صرف دو گھنٹے اضافی نیند لیں تو ڈپریشن کے خطرے میں پچاس فیصد تک کمی آ سکتی ہے، خاص طور پر ان افراد میں جو ہفتے کے دوران مسلسل کام اور خاندانی ذمہ داریوں کے باعث مناسب نیند نہیں لے پاتے۔نیند سے متعلق ایک اور مطالعے میں خبردار کیا گیا ہے کہ اچانک الارم بجنے سے نیند کا تسلسل متاثر ہوتا ہے، جس کا اثر سارا دن تھکن، ذہنی دباؤ اور چڑچڑے پن کی صورت میں سامنے آتا ہے۔ ماہرین کا مشورہ ہے کہ روزانہ ایک مقررہ وقت پر سونا اور جاگنا یا قدرتی روشنی کے ذریعے بیدار ہونا انسانی صحت کے لیے زیادہ فائدہ مند ہے۔