اسلام آباد(مانیٹرنگ ڈیسک) کسی انسان کو بھی ہچکیاں آجانا معمول کی بات ہے ، ہچکیاں بے ضرر ہوتی ہیں اور کچھ منٹ کے اندر ہی ختم ہوجاتی ہیں لیکن اگر آپ کو کثرت سے ہچکیوںکا سامنا ہو تو یہ سنگین طبی مسائل کی جانب اشارہ کر رہی ہوتی ہیں۔

زیادہ ہچکیاں درج ذیل بیماریوں کا عندیہ ہوسکتی ہیں۔ اگر آپ گردوں کے امراض کا شکار ہیں اور آپ کو معلوم نہیں، تاہم اکثر ہچکیوں کا سامنا ہوتا ہے تو یہ اس بات کا عندیہ ہوسکتا ہے کہ آپ کے گردے خراب ہورہے ہیں۔ایسڈ ریفلیکس امراض کی واضح علامات میں سینے میں جلن، کھانے کا ذائقہ تلخ محسوس ہونا اور متلی وغیرہ شامل ہوتی ہیں، مگر یہ بھی حقیقت ہے کہ ہچکیاں بھی اس کی جانب اشارہ کرتی ہیں، اگر ہچکیاں ختم ہونے میں نہ آئیں اور ایسا مسلسل ہو تو آپ کو ڈاکٹر سے رجوع کرنا چاہیئے۔ ہچکیں اس بات کا انتباہ کر رہی ہوتی ہیں کہ آپ کو اپنے لیے کچھ وقت نکالنا چاہیئے، ایک تحقیق کے مطابق اکثر ذہنی طور پر شدید تناوکا شکار ہونے پر ہچکیاں لگ جاتی ہیں، ایسا ہونے پر آپ کو مراقبے، ورزش یا کسی سے بات چیت کرنی چاہیئے۔ ہچکیاں کچھ اقسام کے کینسر جیسے دماغ، معدے یا لمفی نوڈز کے سرطان کی موجودگی کا عندیہ بھی ہوسکتی ہیں، اگر آپ کو مسلسل ہچکیوں کا سامنا ہو اور 48 گھنٹے سے لے کر ایک ماہ سے زیادہ تک یہ شکایت رہے تو یہ کینسر کی علامت ہوسکتی ہے، تاہم ماہرین کا کہنا ہے کہ کینسر کے شکار افراد میں یہ علامت بہت کم سامنے آتی ہے۔