واشنگٹن(نیوز ڈیسک)کیا آپ اکثر اپنی چابیاں بھول جاتے ہیں ؟ یا دیگر روزمرہ کی اشیاکہیں رکھ کر یاد نہیں آتا ؟ اگر ہاں تو یہ دماغی تنزلی یا ڈیمنیشیا جیسے مرض کی ابتدائی علامت ہوسکتی ہے۔یہ بات امریکا میں ہونے والی ایک نئی طبی تحقیق میں سامنے آئی ہے۔کیلیفورنیا یونیورسٹی کی تحقیق میں بتایا گیا ہے کہ یاداشت کے مسائل ڈیمینشیا کی ابتدائی اسٹیج کا خطرہ ظاہر کرتے ہیں۔ایسی خواتین جن کی یاداشت کو اوپر درج کیے گئے مسائل کا سامنا ہوتا ہے ان میں 70 فیصد امکانات اس بات کے ہوتے ہیں کہ کچھ عرصے بعد وہ الزائمر یا ڈیمینشیا کی شکار ہوجائیں گی۔یاداشت کے مسائل کچھ اس طرح کے ہوسکتے ہیں کہ کسی جگہ جاکر یاد نہ آئے کہ وہاں کیوں گئے، یہ یاد کرنے میں کچھ منٹ لگ جائیں کہ گاڑی کہاں پارک کی۔کسی چیز کو کہیں رکھ کر بھول جانا، کسی دوست سے ملنے یا فون کا وعدہ یاد نہ رہنا وغیرہ۔تاہم محققین کا کہنا ہے کہ جب لوگ اپنی روزمرہ کی زندگی میں شامل چیزوں کے نام بھولنے لگے تو یہ ڈیمنشیا کی سنگین علامت ثابت ہوتی ہے۔ان کا مزید کہنا تھا کہ دیگر عناصر جیسے تعلیم، ڈپریشن، ہائی بلڈ پریشر، ذیابیطس، فالج اور امراض قلب کو بھی اس تحقیق کے دوران مدنظر رکھ کر یہ نتیجہ نکالا گیا ہے۔یہ تحقیق طبی جریدے نیورولوجی میں شائع ہوئی۔