پشاور(نیوز ڈیسک)خیبرپختونخواکے ینگ ڈاکٹروں نے حکومت سے کسی بھی قسم کا معاہدہ یا سمجھوتہ ہونے کی تردید کردی ہے اور کہا ہے کہ اگر برسوں سے قائم ڈاکٹروں کی سپشلائزیشن کا سرکاری ادارہ تحلیل کیا گیا تو اس کے خلاف احتجاج کیا جائے گا۔ پشاور میں ینگ ڈاکٹرز ایسوسی ایشن کے چیئرمین ڈاکٹر فیصل نےسرکاری تدریسی اسپتال کے مین گیٹ پر پریس کانفرنس کرتے ہوئے کہا کہ وہ خیبرپختونخوا حکومت کے نئےقانون کی مکمل حمایت کرتے ہیں۔ تاہم اس کے بعد بننے والے قواعد و ضوابط کی روشنی میں پوسٹ گریجویٹ میڈیکل انسٹی ٹیوٹ کی تحلیل کسی صورت قابل قبول نہیں۔پی جی ایم آئی 1983 میں قائم ہوا اور یہ ادارہ ڈاکٹروں کو 35شعبوں میں سپشلائزیشن فراہم کررہاہے۔ڈاکٹر فیصل کا کہنا ہے کہ بعض حکومتی مراعات یافتہ ڈاکٹرزاور مختلف ڈاکٹرز ایسوسی ایشن کے برائے نام نمائندے اس ادارے کو تحلیل کرانے کے درپےہیں جس کی وہ بھرپور مخالفت کریں گے