پشاور(نیوزڈیسک)خیبر پختونخوا میں مون سون سیزن کے بعد ڈینگی کے خطرات منڈلانے لگے۔ محکمہ صحت خیبر پختونخوا نے ملاکنڈ اورہزارہ ڈویڑن میں ڈینگی کے حوالے سے ہائی الرٹ جاری کر دیا ہے۔ڈینگی سرویلنس سیل خیبرپختونخوا کے مطابق پورے صوبے میں ڈینگی کے حوالے سے کوئی خطرناک صورتحال درپیش نہیں البتہ حکومت نے اپنی تیاری مکمل کرلی ہے۔ ان کا کہنا تھا کہ ملاکنڈڈویڑن کے لوئردیر، سوات اورملاکنڈ سمیت ہزارہ ڈویڑن کے ہری پور، ایبٹ آباداورمانسہرہ میں ڈینگی کا خطرہ ہوسکتا ہے جس کے لئے پورے محکمہ صحت کو ہائی الرٹ کی کیفیت میں رکھا گیا ہے اوران علاقوں میں ڈینگی کے مچھرکومارنے کے اسپرے بھی کرائے گئے ہیں۔ ان کا کہنا تھا سوات میں بھی ڈینگی کی صورتحال ابھی تک قابومیں ہے جہاں پرسال 2013 میں 9ہزارسے کچھ زائد کیسزمنظرعام آئے تھے جواگلے سال یعنی 2014 میں 300 تک گئے اوراب حالت یہ ہے کہ وہاں پرصرف دوکیسزسامنے آئے ہیں جن میں سے ایک باہرسے آیا ہوا لگتا ہے۔ لیکن اس کے باوجود پورے صوبے میں ڈینگی سے بچاو کے لئے اقدامات کئے گئے ہیں۔ محکمہ صحت کے حکام کا کہنا ہے کہ جولائی سے لیکراکتوبرتک کا عرصہ ڈینگی کے مچھرکی افزائش کے لئے سازگارہوتا ہے اوراب بھی کسی حد تک خطرات موجود ہیں۔