روم۔۔۔۔ گالف کے عالمی شہرت یافتہ کھلاڑی ٹائیگر وڈز اپنی محبوبہ کو سرپرائز دینے کے لئے اپنا دانت تڑوا بیٹھے۔غیر ملکی خبر رساں ادارے کے مطابق ٹائیگر وڈز کی دوست لینڈسی وون نے اٹلی میں ہونے والے 63واں عالمی الپائن سکیئنگ کپ اپنے نام کیا تھا ، اس حوالے سے وہ تقریب تقسیم انعامات میں شرکت کرکے اپنی دوست کو خوشگوار حیرت میں مبتلا کرنا چاہتے تھے لیکن ٹائیگر ووڈز کو کیا خبر تھی کہ سرپرائز دینے کے جنون میں انہیں لینے کے دینے پڑ جائیں گے۔انعامی تقریب کے دوران اسٹیج پر ایک کیمرہ مین نے انہیں دھکا دے کر آگے بڑھنے کی کوشش کی اور اسی دوران اس کا کیمرہ ٹائیگر وڈز کے منہ پر جا لگا، کیمرے کی ضرب اتنی کاری تھی کہ گالفر کو اپنے ایک دانت سے ہاتھ دھونے پڑ گئے۔