پشاور۔۔۔۔ شمالی وزیرستان کی تحصیل شوال میں ڈرون حملہ کے نتیجے میں چار افراد ہلاک ہوگئے ہیں۔
ذرائع کے مطابق امریکی جاسوس طیارے نے شاہی خیل کے علاقے میں ایک کمپاونڈ پر میزائل داغے جس کے نتیجے میں چار افراد ہلاک ہو گئے ہیں۔ڈرون حملے میں مزید ہلاکتوں کا خدشہ بھی ظاہر کیا جارہاہے جبکہ ابتدائی طور پر ہلاک افراد کی شناخت کے حوالے سے نہیں بتایا جا سکا۔ذرائع نے بتایا کہ علاقہ میں جاسوس طیاروں کی پروازیں بدستور جاری ہے۔یہ رواں سال کیا جانے والا دوسرا ڈرون حملہ ہے جہاں اس سے قبل شمالی وزیرستان میں امریکی جاسوس طیارے کے حملے میں 8مبینہ عسکریت پسند ہلاک ہو گئے تھے۔پاکستان کی جانب سے ڈرون حملوں کو ہمیشہ خود مختاری کی خلاف ورزی قرار دیا گیا ہے اور امریکا سے یہ حملے بند کرنے کا بھی مطالبہ کیا جاتا رہا ہے۔واضح رہے کہ پاکستان کو 2004 سیقبائلی علاقوں میں شدت پسند اسلامی گروپوں کی مزاحمت کا سامنا ہے۔وفاق کے زیرِ انتظام پاک افغان سرحد پر واقع شمالی وزیرستان، خیبر ایجنسی اوراورکزئی ایجنسی سمیت سات ایجنسیوں کو عسکریت پسندوں کی محفوظ پناہ گاہ سمجھا جاتا ہے۔