لاہور / راولپنڈی: حکومت کی جانب سے پٹرولیم مصنوعات کی قیمتوں میں کمی کا اعلان کیا ہوا کہ پٹرول ہی نایاب ہو گیا، پنجاب کے مختلف شہروں میں پٹرول کی شدید قلت کے باعث شہریوں کو شدید مشکلات کا سامنا ہے جب کہ پٹرول پمپس پر گاڑیوں کی لمبی قطاریں لگ گئی ہیں۔ لاہور میں پٹرول کی قلت کا مسئلہ سنگین ہوتا جا رہا ہے اور شہر کے 180 سے زائد پٹرول پمپس پر پٹرول ہی دستیاب نہیں ہے جب کہ جن پمپمس پر پٹرول دستیاب ہے تو وہاں شہریوں کی لمبی قطاریں لگ گئی ہیں۔ پٹرول کی کمی کے باعث شہری سڑکوں پر گاڑیوں اور موٹر سائیکلوں کو دھکا لگانے پر مجبور ہیں جب کہ پٹرول کی عدم دستیابی پر ضلعی حکومت نے مکمل طور پر خاموشی اختیار کر رکھی ہے۔دوسری جانب راولپنڈی میں بھی پٹرول کا حصول شہریوں کے لیے درد سر بن گیا ہے شہر کے بیشتر پٹرول پمپس پر گاڑیوں اور موٹر سائیکلوں کی لمبی قطاریں لگ گئی ہیں۔ پٹرول کی قلت کے باعث سڑکوں پر پبلک ٹرانسپورٹ معمول سے کم ہے جس کی وجہ سے عوام کو دفاتر جانے میں مشکلات کا سامنا ہے۔وزارت پٹرولیم کی جانب سے کہا جا رہا ہے کہ پی ایس او نے کراچی سے پٹرول کی سپلائی بغیر کسی وجہ کے بند کر دی ہے جس کی وجہ سے اتوار کے دن سے شہر کے 70 فیصد سے زائد پمپوں پر پٹرول نایاب ہو گیا۔ جب کہ وزارت خزانہ کا کہنا ہے کہ پٹرول کی بڑھتی ہوئی مانگ کے باعث ملک بھر میں پٹرولیم مصنوعات کی قلت بڑھنے کا امکان ہے۔