اسلام آباد۔۔۔۔ وفاقی وزیر اطلاعات پرویز رشید کا کہنا ہے کہ عمران خان کے وارنٹ گرفتاری پر پولیس کو عمل کرنا چاہئے اور امید ہے کہ انصاف کے علمبردار عمران بھی عدالتوں میں پیش ہوں گے۔
اسلام آباد میں میڈیا سے بات کرتے ہوئے وزیر اطلاعات سینیٹر پرویز رشید نے کہا کہ قوم کو سبز باغ دکھانے والے عمران خان سب کچھ بھول گئے ہیں، انہوں نے پی ٹی وی اور سرکاری اداروں پر حملے کے لیے لوگوں کو اکسایا اور بھول گئے، ان میں الزام خان کے بعد اب ایک بھولا خان بھی سامنے آ گیا ہے جبکہ عمران خان نے خود منتخب ارکان کے خلاف ایف آئی آر کٹوانے کی ابتدا کی ہے۔ انہوں نے کہا کہ عمران خان کے وارنٹ گرفتاری پر پولیس کو عمل کرنا چاہئے اور امید ہے کہ انصاف کے علمبردار عمران عدالتوں میں پیش ہوں گے اور ان ہی ذریعے اپنا ٹرائل کرائیں گے۔پرویز رشید نے کہا کہ صبح کے بھولے عمران اگر گھر واپس آئیں تو ہم انہیں گلے لگائیں گے، نوازشریف کے دورہ لندن سے متعلق سوال پر ان کا کہنا تھا لندن میں نوازشریف نے کسی ہوٹل میں نہیں بلکہ اپنے بیٹے کے گھر قیام کیا۔