اسلام آباد (نیوز ڈیسک) بالی ووڈ اداکار و فلمساز سہیل خان نے اپنے وزن میں نمایاں کمی کے بعد سامنے آنے والی

قیاس آرائیوں کی وضاحت کرتے ہوئے کہا ہے کہ انہوں نے وزن کم کرنے کے لیے اوزیمپک یا کسی بھی قسم کی فیٹ برننگ دوا استعمال نہیں کی۔

ایک حالیہ انٹرویو میں سہیل خان نے وزن گھٹانے والی ادویات کے استعمال سے متعلق افواہوں کو مسترد کرتے ہوئے بتایا کہ ان کی جسمانی تبدیلی کے پیچھے کسی دوا کا ہاتھ نہیں۔ ان کے مطابق رئیلٹی شو ’الائنس‘ میں شرکت کے آغاز کے دوران انہیں پیٹ کی تکلیف کا سامنا کرنا پڑا، جس کے باعث ان کے کھانے پینے کے معمولات بھی متاثر ہوئے۔

اداکار کا کہنا تھا کہ یہ ان کا پہلا رئیلٹی شو تھا، اس لیے ابتدائی دنوں میں انہیں نئے ماحول میں کچھ گھٹن اور بے آرامی محسوس ہوئی۔ تاہم دیگر شرکا کے تعاون اور دیکھ بھال کے باعث وہ تقریباً پانچ ہفتے تک شو کا حصہ رہے۔

سہیل خان کے مطابق شو کے مختلف چیلنجز میں فعال رہنے اور خود کو متحرک رکھنے کے لیے انہیں اپنی خوراک پر خاص توجہ دینا پڑی۔ کھانے پینے میں احتیاط اور مسلسل سرگرمی کے نتیجے میں ان کا وزن بتدریج کم ہوتا گیا۔

انہوں نے بتایا کہ شو کے دوران ان کا مجموعی وزن تقریباً 12 کلو کم ہوا، جس کا ذکر وہ اپنے بھائی سلمان خان کی شو میں شرکت کے دوران بھی کرچکے ہیں۔

شو کے اختتام پر سہیل خان کی جسمانی ساخت میں واضح تبدیلی نے مداحوں کی توجہ حاصل کی۔ سوشل میڈیا پر بعض صارفین نے ان کی صحت کے بارے میں تشویش کا اظہار کیا، جبکہ کچھ لوگوں نے قیاس کیا کہ شاید انہوں نے وزن کم کرنے والی ادویات کا سہارا لیا ہے۔

تاہم سہیل خان نے ان تمام قیاس آرائیوں کی تردید کرتے ہوئے واضح کیا کہ 12 کلو وزن کم کرنے کے لیے نہ اوزیمپک استعمال کیا اور نہ ہی کسی فیٹ برنر کا سہارا لیا۔