ممبئی (این این آئی)بھارتی ریاست راجستھان کے شہر کوٹا میں فلیٹ میں آگ لگنے سے مشہور چائلڈ ایکٹر 10 سالہ ویر شرما اور ان کے بڑے بھائی 15 سالہ شوریا شرما دم گھٹنے سے ہلاک ہوگئے۔بھارتی میڈیا کے مطابق دونوں بھائی اپنے فلیٹ کے کمرے میں سو رہے تھے جب انتن پورہ علاقے کی ڈیپ شری بلڈنگ کی چوتھی منزل پر واقع ان کے گھر میں آگ لگ گئی۔ آگ ڈرائنگ روم میں شارٹ سرکٹ کے باعث لگی، جو زیادہ تو نہیں پھیلی لیکن دھوئیں نے پورے فلیٹ کو اپنی لپیٹ میں لے لیا۔دھواں بھر جانے سے ویر اور شوریا کا دم گھٹ گیا اور دونوں موقع پر ہی چل بسے۔ویر شرما نے مقبول ٹی وی شو میں کم عمر لکشمن کا کردار ادا کرکے شہرت حاصل کی تھی اور وہ ایک آنے والی فلم میں سیف علی خان کے بچپن کا کردار ادا کرنے والے تھے۔

ان کی اچانک موت نے مداحوں اور فلمی دنیا کو صدمے میں ڈال دیا ہے۔اداکار ویر شرما کے والد کا کہنا تھا کہ گھر میں شارٹ سرکٹ کے باعث آگ لگی اور دھواں بھر گیا، حادثے کے وقت میں قریب کے علاقے میں موجود تھا، جہاں مجھے کسی نے بتایا کہ میرے فلیٹ سے دھواں نکل رہا ہے۔ انہوں نے کہا کہ یہ سن کر میں بھاگتا ہوا اپنے گھر گیا اور اس کا دروازہ توڑ کر اندر داخل ہوا تو ہر طرف دھواں ہی دھواں تھا۔ بچوں کو اسپتال لے گیا لیکن دونوں کا دم گھٹنے سے انتقال ہوگیا۔ویر شرما کے والد کا کہنا تھا کہ مجھے ایک لمحے کے لیے ایسا لگا تھا کہ شاید اپنے بچوں کو بچا لوں گا، لیکن بے بسی سے دیکھتا رہ گیا۔