اسلام آباد (نیوز ڈیسک) اداکار و گلوکار عاشر وجاہت نے حالیہ پوڈکاسٹ میں انکشاف کیا ہے کہ انہوں نے اپنے شہرت یافتہ شوبز دوستوں سے دوری اختیار کرنے کا فیصلہ ایک اہم مشورے کی بنیاد پر کیا تھا۔عاشر وجاہت کا کہنا تھا کہ ایک معروف اداکار نے انہیں یہ نصیحت کی تھی کہ اگر وہ فنی صلاحیتوں میں نکھار چاہتے ہیں تو اپنی توجہ شہرت سے زیادہ کام پر مرکوز کریں اور سوشل میڈیا پر دوسروں کے ساتھ غیر ضروری نمائش سے اجتناب برتیں۔یاد رہے کہ ایک وقت تھا جب عاشر وجاہت اور ہانیہ عامر کی گہری دوستی خبروں کی زینت بنی رہتی تھی۔

دونوں کو اکثر ساتھ گھومتے پھرتے اور خوشگوار لمحات گزارتے دیکھا جاتا، جس پر مداحوں کی طرف سے بھی دلچسپی کا اظہار کیا جاتا تھا۔جون 2021 میں ایک ویڈیو وائرل ہوئی تھی جس میں ہانیہ، عاشر اور ان کے بھائی نائل کو ایک کمرے میں میوزک پر لپ سنکنگ کرتے اور بے تکلف انداز میں بیٹھے ہوئے دیکھا گیا۔ اس ویڈیو کو سوشل میڈیا صارفین کی جانب سے شدید تنقید کا سامنا کرنا پڑا، جس کے بعد عاشر اور ہانیہ کی دوستی منظرِ عام سے غائب ہو گئی۔اب عاشر وجاہت نے وضاحت دی ہے کہ وہ اب بھی ان دوستوں سے میل جول رکھتے ہیں، تاہم اپنی ملاقاتوں کو سوشل میڈیا پر شیئر نہیں کرتے، کیونکہ وہ چاہتے ہیں کہ ان کی پہچان ان کے کام کے ذریعے ہو، نہ کہ ان کی دوستیاں یا مشہور شخصیات کے ساتھ تصاویر کے باعث۔