اسلام آباد (نیوز ڈیسک) پاکستانی یوٹیوبر رجب بٹ، جو حالیہ دنوں میں مختلف مشکلات کا سامنا کر رہے ہیں، نے عمرے کی سعادت حاصل کر لی۔ انہوں نے خانہ کعبہ کے صحن میں کھڑے ہو کر اللہ کو گواہ بنا کر اپنے موقف کی وضاحت کی اور معافی طلب کی۔

رجب بٹ نے مسجد الحرام کے مطاف میں احرام کی حالت میں ایک ویڈیو ریکارڈ کی، جسے بعد میں سوشل میڈیا پر شیئر کیا۔ اپنی ویڈیو کے آغاز میں انہوں نے درود شریف پڑھا اور کلمہ طیبہ کا ورد کیا، اس کے بعد کہا کہ وہ اپنا مال، جان، والدین، اولاد اور خون کا ایک ایک قطرہ نبی کریم ﷺ پر قربان کرنے کو تیار ہیں۔

انہوں نے مزید کہا کہ سوشل میڈیا پر ان سے متعلق جو تنازعات اور مسائل زیر بحث ہیں، ان کے بارے میں وہ اس مقدس مقام پر حلفیہ بیان دیتے ہیں کہ انہوں نے جان بوجھ کر کچھ بھی غلط نہیں کیا۔ انہوں نے وضاحت کرتے ہوئے کہا کہ اگر ان سے لاعلمی میں کوئی غلطی سرزد ہوئی ہے تو وہ پہلے بھی اس پر معذرت کر چکے ہیں اور ایک بار پھر ہاتھ جوڑ کر سب سے معافی مانگتے ہیں۔ انہوں نے عوام سے درخواست کی کہ وہ ان کے لیے اپنے دل صاف کر لیں۔

یوٹیوبر نے علماء کرام، پنجاب حکومت اور پاک فوج سے اپیل کی کہ ان کے خلاف درج پیکا ایکٹ کے مقدمے پر نظرثانی کی جائے اور انصاف فراہم کیا جائے۔

رجب بٹ نے اپنی گفتگو میں اس بات پر بھی زور دیا کہ ان پر لگائی گئی 295 کی دفعہ کے حوالے سے انہوں نے اپنے وی لاگ میں وضاحت کی تھی کہ یہ بے بنیاد ہے، لیکن ان کی بات کو توڑ مروڑ کر پیش کیا گیا اور فتویٰ جاری کر دیا گیا۔

ویڈیو کے آخر میں، انہوں نے ایک مرتبہ پھر اللہ، نبی کریم ﷺ اور تمام مسلمانوں سے معذرت کرتے ہوئے دعا کی کہ ان کی معافی قبول کی جائے۔