کراچی(این این آئی)مقبول ڈرامہ سیریل منت مراد میں عادل کا کردار ادا کرنے والے معروف اداکار ٹیپو شریف کے والد کا انتقال ہوگیا۔اداکار ٹیپو شریف نے سوشل میڈیا کے ذریعے اپنے والد کے انتقال کی افسوسناک خبر کا اعلان کیا۔انہوں نے اپنے آفیشل انسٹاگرام ہینڈل کی اسٹوری میں بتایا کہ ان کے والد، ان کے دوست اکرام بھٹی خالقِ حقیقی سے جا ملے ہیں۔ٹیپو شریف نے بتایا کہ ان کے والد کی نمازِ جنازہ آج عصر کی نماز کے بعد کراچی کے علاقے کلفٹن کی ابوبکر صدیق مسجد میں ادا کی گئی۔
اداکار نے اس مشکل وقت میں اپنے دوستوں اور چاہنے والوں سے ان کے والد کی مغفرت کے لیے دعائوں کی درخواست بھی کی۔مداحوں اور شوبز انڈسٹری سے وابستہ فنکاروں کی جانب سے ٹیپو کے والد کے انتقال کی خبر پر گہرے دکھ کا اظہار کیا جارہا ہے۔اس سے قبل ٹیپو نے اپنی انسٹاگرام اسٹوری میں دعائوں کی اپیل کرتے ہوئے بتایا تھا کہ ان کے والد طبیعت ناسازی کی وجہ سے آئی سی یو میں داخل ہیں۔
واضح رہے کہ اداکار ٹیپو شریف نے اپنے کیریئر کے دوران کئی پاکستانی ڈراموں میں اداکاری کے جوہر دکھائے ہیں، ان کے حالیہ ڈراموں میں منت مراد، سیانی اور کیسی تیری خود غرضی شامل ہیں۔اداکار کے والد پاکستانی ہیں جبکہ ان کی والدہ ترک خاتون ہیں اور ان کا پورا نام سید یورگچ ٹیپو شریف ہے۔
