لاہور( این این آئی)نامور پاکستانی گلوکار ابرارالحق نے غلاف کعبہ کی تیاری میں حصہ لینے کی ویڈیو ٹوئٹر پر شیئر کردی۔ٹوئٹر اکانٹ پر شیئر کی گئی ویڈیو میں دیکھا جا سکتا ہے کہ ابرار الحق غلافِ کعبہ پر سوئی سے ٹانکے لگاتے نظر آرہے ہیں۔اپنے پیغام میں ابرارالحق نے لکھا کہ اگر میرے والدین زندہ ہوتے تو بہت خوش ہوتے کہ ان کے گناہگار بیٹے کو اللہ تعالی نے اس سال کے نئے غلافِ کعبہ پر سونے کے دھاگے سے ایک ٹانکا لگانے کی سعادت دی ہے۔خانہ کعبہ کا غلاف کئی دہائیوں سے ہر سال ذوالحجہ کے اسلامی مہینے میں حج کے موقع پر نو ذوالحجہ کو تبدیل کیا جاتا رہا ہے تاہم سعودی عرب کی تاریخ میں پہلی بار یکم محرم کو غلافِ کعبہ کی تبدیلی کی گئی۔