کراچی (این این آئی)رواں برس کے آغاز میں شادی کے بندھن میں بندھنے والی اداکارہ صبور علی نے حال ہی میں انسٹاگرام پر اپنے پرانے برائیڈل شوٹ کی ان دیکھی ویڈیوز اور تصاویر شیئر کرتے ہوئے بتایا ہے کہ کس طرح وہ شوٹنگ کے دوران جھلسنے سے بچ گئیں۔صبور علی نے 6 جون کو گزشتہ ماہ مئی کے آغاز میں کرائے گئے اپنے برائڈل فوٹو شوٹ کی

ان دیکھی تصاویر اور ایک ویڈیو شیئر کرتے ہوئے بتایا کہ ایسا نہیں ہے کہ اداکاری صرف گلیمرس کا نام ہے۔انہوں نے بتایا کہ بعض اوقات شوٹنگ کے دوران اداکاروں کو انتہائی خطرناک کام بھی کرنے پڑتے ہیں اور ایسے اسٹنٹ بھی کیے جاتے ہیں، جو انتہائی خطرناک ہوتے ہیں۔انہوں نے کہا کہ اداکاری کرنا سخت محنت طلب کام ہے، اسے صرف گلیمرس کی دنیا سمجھنا غلط ہے۔ان کی جانب سے شیئر کی گئی ویڈیو میں انہیں جہیز کے خلاف تشہیری برائڈل فوٹو شوٹ کے دوران آگ کی بھٹی کے قریب کھڑے ہوئے دیکھا جا سکتا ہے اور اس دوران اچانک آگ کی لکڑی گر کر ان کے قریب آجاتی ہے۔آگ کے شعلوں میں بھڑکتی لکڑی کے قریب گرنے سے صبور علی کچھ قدم پیچھے ہوجاتی ہیں، تاہم انہیں ویڈیو میں پرسکون انداز میں شوٹ کرواتے ہوئے دیکھا جا سکتا ہے۔اداکارہ نے جس برائیڈل شوٹ کی تصاویر اور ویڈیو شیئر کی، وہ انہوں نے مئی کے آغاز میں کروایا تھا، جس میں انہوں نے سرخ لباس پہن کر جہیز خوری کے خلاف شعور بیدا کیا تھا۔جہیز خوری کے خلاف شوٹ کیے گئے تشہیری فوٹوشوٹ کی تصاویر وائرل ہوگئی تھیں اور لوگوں نے ان کی تصاویر کو سراہا تھا۔شادی کے بعد مذکورہ فوٹو شوٹ اداکارہ کا پہلا شوٹ تھا، اس سے قبل وہ شادی سے پہلے برائیڈل شوٹ کروا چکی تھیں۔انہوں نے رواں برس کے آغاز میں دیرینہ دوست اداکار علی انصاری سے شادی کی تھی، جن سے انہوں نے گزشتہ برس منگنی کی تھی۔شادی کے بعد صبور علی کو اسکرین پر کم دیکھا جا رہا ہے، البتہ انہیں شوز اور تقاریب میں دیکھا جاتا رہا ہے۔