اسلام آباد (مانیٹرنگ ڈیسک) سماجی اور مذہبی اقدار کے منافی پیمرا نے اے آر وائی ڈیجیٹل کے ایک اور ڈرامہ سیریل پر پابندی عائد کر دی، پیمرا نے اے آر وائی ڈیجیٹل کے ڈرامہ سیریل جلن کی نشریات پر فوری طور پر مکمل پابندی عائد کر دی ہے، مذکورہ ڈرامہ سیریل
میں سماجی اور مذہبی اقدار کے منافی مواد نشر کرنے پر شدید عوامی ردعمل اور شکایات موصول ہو رہی تھیں، پیمرا نے سماجی رابطے کی ویب سائٹ ٹوئٹر پر جاری نوٹس میں مزید کہا کہ چینل کی جانب سے ڈرامہ کے سکرپٹ میں خاطر خواہ تبدیلی نہ ہونے پر کارروائی کرتے ہوئے پیمرا آرڈیننس کے سیکشن 27 کے تحت مذکورہ ڈرامہ نشر کرنے پر پابندی عائد کر دی ہے، چینل انتظامیہ کو بارہا متنبہ کیا گیا تھا کہ ڈرامہ کے مواد کا جائزہ لیں اور سکرپٹ کو پاکستانی اقدار کے مطابق بنائیں بصورت دیگر پیمرا آرڈیننس کے تحت کارروائی کی جائے گی۔ یہاں یہ بات بھی قابل ذکر ہے کہ پیمرا نے 18 اگست کو تمام چینلز کو مفصل ہدایت نامہ جاری کیا تھا اور ڈراموں کے مواد کو پاکستانی اقدار کے مطابق بنائے جانے سے متعلق حتمی ہدایت نامہ جاری کیا تھا۔ تاہم چینل انتظامیہ کی جانب سے کوئی خاطر خواہ کارروائی نہ ہونے کی صورت میں اتھارٹی کو حتمی قدم اٹھاتے ہوئے ڈرامہ سیریل جلن کی نشریات پر پابندی عائد کرنا پڑی جس پر اے آر وائی ڈیجیٹل کو فوری عملدرآمد کی ہدایت دی گئی ہے۔