ممبئی (این این آئی) بالی ووڈ شہنشاہ سپر سٹار امیتابھ بچن کو طبیعت خراب ہونے پر ممبئی کے ناناوتی ہسپتال میں داخل کرادیا گیا ہے۔ بھارتی میڈیا کے مطابق جگر کے عارضے میں مبتلا معروف اداکار امیتابھ بچن کو خرابی صحت کے باعث نانا وتی ہسپتال میں داخل کیا گیا ہے جہاں اْن کیلئے ایک مخصوص کمرہ تیار کیا گیا ہے جس میں انتہائی نگہداشت کی تمام سہولیات موجود ہیں،ہسپتال کے کمرے میں اہل خانہ کے علاوہ کسی کو جانے کی اجازت نہیں دی جارہی ہے جبکہ خاندانی ذرائع بھی امیتابھ بچن کی بیماری کے حوالے سے چپ سادھے ہوئے ہیں۔ ٹویٹر پر ہمہ وقت موجود رہنے والے امیتابھ بچن نے
5 دن میں صرف 6 ٹویٹس کی ہیں۔جواں عزم امیتابھ بچن ٹی بی اور ہیپاٹائٹس بی کو شکست دے چکے ہیں، اْن کا جگر صرف 25 فیصد کام کر رہا ہے لیکن اس کے باوجود وہ ایک بھرپور اور متحرک زندگی گزار رہے ہیں، امیتابھ بچن کو ہیپاٹائٹس بی کا مرض 1983 میں ایک بوتل خون کی منتقلی کے دوران لاحق ہوا تھا۔واضح رہے کہ فلم قلی کے ایک فائٹنگ سین میں پیٹ میں چوٹ لگنے سے امیتابھ بچن شدید زخمی ہوگئے تھے جس پر انہیں ہسپتال لے جایا گیا جہاں انہیں ایک بوتل خون کی ضرورت پڑی، بدقسمتی سے وہ خون آلودہ تھا اور اس میں ہیپاٹائٹس کے جراثیم تھے جو ان کے جسم میں منتقل ہوگئے۔
