لاہور( این این آئی)میلوڈی کوئین او رپرائیڈ آف پرفارمنس گلوکارہ و اداکارہ شاہدہ منی نے کہا ہے کہ ایس ایم پروڈکشن نوجوان ٹیلنٹ کو پروموٹ کرنے کا پلیٹ فارم ہے جس کا دائرہ مزید وسیع کیا جائے گا ۔’’ این این آئی ‘‘ سے خصوصی گفتگو کرتے ہوئے شاہدہ منی نے کہا کہ جب میں نے اس پروڈکشن کا آغاز کیا تو میرے ذہن میں یہی
خیال تھا کہ اس پلیٹ فارم کے ذریعے ملک بھر کے نوجوان ٹیلنٹ کو پروموٹ کروں گی ۔ایس ایم پروڈکشن کے بینر تلے فلم اور ٹی وی ڈراموں کے علاوہ میوزیکل پروگرام بھی کئے جائیں گے ۔ انہوں نے کہا کہ میری ہمیشہ سے کوشش رہی ہے کہ جہاں تک ہو سکے فن کی خدمت کروں اور اسی جذبے کے تحت ایس ایم پروڈکشن کی بنیاد رکھی جو کامیابیوں کی جانب گامزن ہے ۔
