ممبئی (این این آئی) آئی سی سی ون ڈے رینکنگ میں نمبر ون پر موجود بائولر جسپریت بمرا اور جنوبی ہندوستان کی فلم انڈسٹری کی اداکارہ انوپما پرمیشورن کے معاشقے کی خبریں کافی عرصے سے میڈیا میں گرم ہیں لیکن اب اداکارہ نے اس حوالے سے کھل کر بات کی ہے۔ بھارت کے کرکٹرز اور اداکاروں کے مابین معاشقے اور شادیاں ہونا معمول کی بات ہے جس کی واضح مثال محمد اظہر الدین اور سنگیتا بجلانی، ویرات کوہلی اور انوشکا شرما، یووراج سنگھ اور ہیزل کیچ ، ہربھجن سنگھ اور گیتا بسرا ہیں۔ ان کے علاوہ بھی بہت سے
کرکٹرز نے اداکارائوں سے شادیاں کی ہیں جن میں نیا اضافہ نوجوان بائولر جسپریت بمرا کا ہے جن کے بارے میں کہا جارہا ہے کہ وہ سائوتھ انڈین فلموں کی اداکارہ انوپما پرمیشورن کی زلفوں کے اسیر ہوچکے ہیں تاہم اب اداکارہ نے معاشقے کی خبروں کی تردید کرتے ہوئے واضح کیا ہے کہ دونوں کے مابین صرف اچھی دوستی ہے۔ جسپریت بمرا اس وقت نیوزی لینڈ کے خلاف سیمی فائنل میں مصروف ہیں ، ورلڈ کپ کے اختتام کے بعد وہ بھارت واپس جائیں گے تو انہیں اداکارہ کے بیان پر سوالات کا سامنا کرنا پڑ سکتا ہے۔
