لاہور (این این آئی) پاکستان کی خوبرو اداکارہ امایا علی نے اعتراف کیا ہے کہ انہیں ماضی میں نہ صرف بالی ووڈ کھلاڑی اکشے کمار کے ساتھ کام کرنے کی پیش کش ہوئی بلکہ وہ آڈیشن دینے کیلئے بھارت بھی گئی تھیں۔ایک انٹرویو میں مایا علی نے میڈیا پر اکشے کمار کیساتھ بالی ووڈ فلم میں کام کرنے کی
پیشکش کے حوالے سے گردش کرنیوالی خبروں کی تصدیق کرتے ہوئے کہا کہ یہ خبریں درست ہیں، تاہم ساتھ ہی انہوں نے واضح کیا کہ یہ پرانی خبریں ہیں۔مایا علی نے بتایا کہ یہ خبریں ان کی جانب سے دبئی کے ایک شوبز میگزین کو دیے گئے پرانے انٹرویو سے لی گئی ہیں، جس میں انہوں نے میگزین کو بتایا تھا کہ انہیں اکشے کمار کے ساتھ فلم میں کام کرنے کی پیش کش ہوئی تھی۔اداکارہ نے کہا کہ انہیں نہ صرف اکشے کمار کیساتھ فلم میں کام کرنے کی پیشکش ہوئی تھی بلکہ وہ اسی فلم کی ٹیم کی جانب سے دعوت پر اوڈیشن کیلئے بھارت بھی گئی تھیں۔ انہوں نے انکشاف کیا تھا کہ انہوں نے فلم کیلئے آڈیشن بھی دیا تھا اور تقریبا اکشے کمار کے ساتھ انہیں کاسٹ کرنے کا معاملہ طے پا گیا تھا۔مایا علی نے کہا کہ جب انہیں کاسٹ کرنے کے معاملات آخری مراحل میں تھے تو بھارت میں پاکستانی فنکاروں پر کام کرنے کی پابندی عائد کردی گئی اور وہ بالی ووڈ فلم میں کاسٹ ہوتے ہوتے رہ گئیں۔اداکارہ نے امید ظاہر کی کہ انہیں اگر دوبارہ بھی اچھے کام کی پیش کش ہوئی تو وہ اسے ضرور قبول کریں گی۔
