اسلام آباد(آن لائن) پاکستانی اداکارہ سعدیہ امام نے دعویٰ کیا کہ انہوں نے چند ایسے گانوں کو تحریر کیا جس کی گلوکاری راحت فتح علی خان نے کی لیکن ان گانوں کا انہیں کریڈٹ نہیں دیا گیا۔مشہور زمانہ گانا ’’جیا دھڑک دھڑک‘‘ انہوں نے ہی تحریر کیا جس کی گلوکاری کامیاب پاکستانی گلوکار راحت فتح علی خان نے کی۔
شاید مجھے پیسے ملنے لگتے اس لیے مجھے راحت نے کریڈٹ نہیں دیا۔سعدیہ امام نے مزید بتایا کہ انہیں راحت سے کوئی شکوہ نہیں کیوں کہ وہ ان کے بہت اچھے دوست ہیں اور وہ کافی پہلے یہ گانے انہیں دے چکی ہیں اور جب انہوں نے یہ گانا تحریر کیا تھا تب وہ خود بھی نہیں جانتی تھی کہ مکمل ہوکر یہ اتنا خوبصورت بن کر سامنے آئے گا۔سعدیہ امام کے مطابق وہ جیا دھڑک دھڑک کے علاوہ ایک اور کامیاب گانے ’’زندگی سفر میں ہے کٹ رہا ہے راستہ‘‘ کو تحریر کرچکی ہیں جس کی گلوکاری بھی راحت فتح علی خان نے کی ہے۔اداکارہ نے یہ بھی بتایا کہ راحت نے شاید اس لیے ایسا کیا کیوں کہ وہ بھارت میں یہ نہیں دکھانا چاہتے تھے کہ یہ گانے کسی پاکستانی نے تحریر کیے۔یاد رہے کہ جن گانوں کو تحریر کرنے کا دعویٰ سعدیہ امام کررہی ہیں وہ بولی وڈ فلموں میں شامل کیے گئے، جو آج دنیا بھر کے کامیاب گانوں میں شمار کیے جاتے ہیں۔حیرانی کی بات یہ ہے کہ یوٹیوب پر شیئر کردہ ان گانوں میں لکھاریوں کا کریڈٹ کسی دوسرے شاعروں کو دیا گیا۔جیا دھڑک دھڑک گانے کا کریڈٹ سعدیہ امام کی جگہ سعید قادری کو دیا گیا، جبکہ زندگی سفر میں ہے گانے کا کریڈٹ سچن گپتا کو دیا گیا۔
