لندن(این این آئی)برطانیہ کے 60 سالہ اسٹینڈ اپ کامیڈین لین کاگنیٹو اسٹیج ڈرامے کی پرفارمنس کے دوران ہارٹ اٹیک سے چل بسے۔امریکی نشریاتی ادارے کے مطابق لین کاگنیٹو کی موت ایک ایسے وقت میں ہوئی جب انہوں نے کچھ لمحے قبل ہی ڈرامے میں ہارٹ اٹیک یا فالج سے متعلق اداکاری کا ایک سین پیش کیا۔
لین کاگنیٹو اسٹیج ڈرامے میں براہ راست اداکاری کے جوہر دکھا رہے تھے کہ انہیں دل کا دورہ پڑا اور وہ آرام سے اسٹیج پر بیٹھ گئے اور انہوں نے اپنی بانہیں پیچھے کی جانب پھیلا کر آنکھیں بند کرلیں۔رپورٹ کے مطابق لین کاگنیٹو کے اس عمل کو ناظرین نے ڈرامے کی سین سمجھا اور انتہائی خاموشی وغور سے انہیں دیکھتے رہے۔ لین کاگنیٹو جب چند منٹ تک یوں ہی لیٹے رہے تو ان کے ساتھی اداکاروں نے اسٹیج پر آکر انہیں اٹھایا اور انہیں احساس ہوا کہ ان کے ساتھ کوئی مسئلہ ہوا ہے۔رپورٹ کے مطابق تھیٹر انتطامیہ اور اسٹیج اداکاروں نے ایمبولینس سروس اور میڈیکل عملے کو فون کیا تاہم جب تک میڈیکل عملہ پہنچا تب تک کامیڈین چل بسے تھے۔میڈیکل عملے نے تصدیق کی کہ لین کاگنیٹو کی موت ہارٹ اٹیک سے ہوئی۔کامیڈین کی اسٹیج پر ہونے والی ڈرامائی موت پر ان کے ساتھ اداکاروں نے سوشل میڈیا پر انہیں خراج تحسین پیش کیا اورانہیں حقیقی کامیڈین قرار دیا۔متعدد برطانوی اداکاروں نے لین کاگنیٹو کو عظیم کامیڈین قرار دیا اور ان کی جانب سے کی جانے والی شاندار کامیڈی کو بھی سراہا۔
