ممبئی (شوبز ڈیسک) بالی ووڈ کے ایکشن ہیرو سنیل شیٹھی کی بیٹی اتھیا شیٹھی کے بعد بیٹا اہان شیٹھی بھی بھارتی فلم نگری میں انٹری دینے کے لیے تیار ہے۔بھارتی میڈیا کے مطابق اداکار سنیل شیٹھی کے بائیس سالہ بیٹے اہان شیٹھی تیلگو زبان کی رومانٹک فلم ‘آر ایکس 100’ کے آفیشل ہندی ریمیک میں پیار کا جادو جگاتے نظر آئیں گے۔اہان شیٹھی ساجد نڈیاڈوالا کی پروڈکشن ہاؤس

کے بینر تلے بننے والی فلم میں ایکشن دکھائیں گے، اس فلم کو آئندہ برس مئی تک ریلیز کیے جانے کا امکان ہے۔فلم کے حوالے سے بات کرتے ہوئے پروڈیوسر ساجد نڈیاڈوالا کا کہنا تھا کہ اہان شیٹھی تیلگو زبان کی رومانٹک فلم کے ہندی ریمیک سے اپنا کیریئر شروع کریں گے۔فلم پروڈیوسر نے دیگر کاسٹ کے حوالے سے تصدیق نہیں کی، تاہم بتایا کہ اہان شیٹھی ان کی فلم کے مرکزی ہیرو ہوں گے۔فلم ‘آر ایکس 100’ کی کہانی ایک لڑکے اور لڑکی کے پیار کے گرد گھومتی ہے، جن کے خاندان والوں کو ان کا پیار اور رشتہ قبول نہیں ہوتا، بعد ازاں لڑکے پر یہ انکشاف ہوتا ہے کہ لڑکی نے دراصل کبھی اس سے سچا پیار کیا ہی نہ تھا، وہ تو بس اپنی جنسی خواہشات کی تکمیل کے لیے پیار کا ڈھونگ کر رہی تھیں۔دلچسپ بات یہ ہے کہ اہان شیٹھی کو وہ فلم پروڈیوسر ہی متعارف کرانے جا رہے ہیں، جنہوں نے پچیس سال قبل ان کے والد سنیل شیٹھی کو متعارف کرایا تھا۔سنیل شیٹھی نے بھی ساجد نڈیاڈوالا کی پچیس سال قبل ریلیز ہونے والی فلم ‘وقت ہمارا ہے’ سے کیریئر کا آغاز کیا تھا۔