بیجنگ (شوبز ڈیسک)ہولی وڈ فلم سیریز ایکس مین فیوچر پاسٹ میں کام کرکے دنیا بھر میں شہرت حاصل کرنے والی چینی اداکارہ فان بنگ بنگ 3 ماہ کی پراسرار گمشدگی کے بعد منظرعام پر آگئیں۔رواں سال جولائی کے آغاز میں یہ اداکارہ اچانک اس وقت غائب ہوگئی تھیں جب اس پر ٹیکس چوری کا الزام عائد کیا گیا۔چینی میڈیا کی سامنے آنے والی رپورٹ کے مطابق فان بنگ بنگ نے ایک فلم میں

کام کرنے پر 3 کروڑ چینی یوآن (53 کروڑ پاکستانی روپے سے زائد) کمائے مگر اس آمدنی کو 2 معاہدوں میں تقسیم کرکے پیش کیا، یعنی عوام کے سامنے ایک کروڑ یوآن لینے کا معاہدہ پیش کیا جبکہ 2 کروڑ یوآن خفیہ معاہدے کے تحت لیے، تاکہ ٹیکسوں سے بچ سکیں۔اب 3 ماہ بعد اداکارہ نے پہلی بار خاموشی توڑتے ہوئے چینی حکومت سے معذرت کرتے ہوئے اپنے اوپر عائد 15 ارب روپے سے زائد کے ٹیکس اور جرمانے ادا کیے ہیں۔چینی سوشل میڈیا نیٹ ورک ویبو میں شائع اپنے بیان میں اداکارہ نے غلط کام کرنے کا اعتراف کرتے ہوئے کہا کہ میں ٹیکس چوری پر بہت شرمندہ ہوں اور سزا دیئے جانے پر چینی حکام کو سراہتی ہوں۔چینی میڈیا کے مطابق مختلف خفیہ معاہدوں کے ذریعے اداکارہ اور کمپنیوں نے 24 کروڑ 80 لاکھ یوآن ٹیکسوں کی مد میں بچائے، تاہم ان کمپنیوں کے حوالے سے تفصیلات بیان نہیں کی گئیں۔اداکارہ اور ان کی کمپنیوں پر مجموعی طور پر 88 کروڑ سے زائد یوآن کا جرمانہ عائد کیا گیا ہے، جن میں سے اداکارہ کو ذاتی طور پر 47 کروڑ 90 لاکھ یوآن ادا کرنے ہیں، مگر یہ واضح نہیں کہ باقی رقم کس کو ادا کرنی ہے۔