ممبئی (شوبز ڈیسک)بالی ووڈ کی خوبصورت اور کامیاب اداکارہ دپیکا پڈوکون نے فلم باجی راؤ مستانی کو اپنے کیریئر کی مشکل ترین فلم قرار دیدیا۔ ایک بھارتی جریدے کے ساتھ انٹرویو میں اداکارہ نے کہا کہ ان کی فلم ’باجی راؤ مستانی‘ ان کے کیرئیر کی سب سے مشکل ترین فلم ہونے کے ساتھ ساتھ ان کے لیے جذباتی طور پر بھی کافی اہم رہی ہے۔ان کا کہنا تھا کہ اپنی فلم ’رام لیلا‘ کی شوٹنگ کرنے کے دوران انہیں احساس ہوتا تھا کہ فلم بہت ہی

مشکل ہے تاہم باجی راؤ مستانی کی شوٹنگ کرکے انہیں ’رام لیلا‘ آسان لگنے لگی ہے۔دپیکا کے مطابق انہوں نے فلم ’باجی راؤ مستانی‘ میں بہت زیادہ محنت کی ہے اور یہ فلم ان پر جسمانی اور ذہنی دونوں طرح ہی کافی اثر انداز ہوئی۔ان کا مزید کہنا تھا کہ اس فلم کی شوٹنگ لگاتار 10 گھنٹے جاری رہتی تھی جس کے بعد بھی فلم کا تمام عملہ اس فلم کی تیاریوں میں مصروف رہا کرتا جس میں گھڑ سواری، ڈائیلاگ کی پریکٹس اور ڈانس وغیرہ شامل تھی۔