اسلام آباد(نیوز ڈ یسک)پاکستانی عازمین حج کے لیے سعودی عرب میں سہولیات بہتر بنانے کی غرض سے پاکستان اور سعودی عرب کے درمیان اہم معاہدہ طے پا گیا ہے،
جس کے تحت حج کے انتظامات کو مزید منظم اور آسان بنانے کے لیے مشترکہ اقدامات کیے جائیں گے۔سعودی عرب میں منعقد ہونے والی عالمی حج ایکسپو کے دوران دونوں ممالک کے حکام نے اس معاہدے پر دستخط کیے۔ اس کا بنیادی مقصد پاکستانی حجاج کو سفر، رہائش اور دیگر ضروری سہولیات کی فراہمی کو بہتر بنانا اور ان کے لیے مقدس سفر کو زیادہ آرام دہ بنانا ہے۔معاہدے کی دستاویز پر پاکستان کے وفاقی وزیر مذہبی امور سردار محمد یوسف اور سعودی وزیر حج و عمرہ ڈاکٹر توفیق الربیعہ نے دستخط کیے۔ اس موقع پر وزارت مذہبی امور کے سیکرٹری ابرار احمد مرزا بھی موجود تھے۔دونوں ممالک نے اس بات پر اتفاق کیا کہ حج سے متعلق انتظامی امور میں شفافیت اور کارکردگی کو مزید بہتر بنایا جائے گا، تاکہ پاکستانی عازمین کو دوران حج درپیش مشکلات میں کمی لائی جا سکے اور انہیں بہتر سہولیات میسر آئیں۔معاہدے میں ’روڈ ٹو مکہ‘ منصوبے کو مزید مؤثر بنانے اور اس کا دائرہ وسیع کرنے پر بھی اتفاق کیا گیا۔
اس اقدام کا مقصد پاکستانی حجاج کے لیے امیگریشن کے مراحل آسان بنانا اور ان کا قیمتی وقت بچانا ہے۔اس موقع پر وفاقی وزیر مذہبی امور سردار محمد یوسف نے سعودی وزیر حج و عمرہ ڈاکٹر توفیق الربیعہ سے الگ ملاقات بھی کی، جس میں پاکستان اور سعودی عرب کے تعلقات کے ساتھ حج اور عمرہ کے شعبوں میں تعاون بڑھانے کے امکانات پر تفصیلی تبادلہ خیال کیا گیا۔ملاقات کے اختتام پر دونوں رہنماؤں نے یادگاری شیلڈز اور تصاویر کا تبادلہ بھی کیا۔
