اسلام آباد(نیوز ڈیسک)مستحق طلبہ کی مالی معاونت اور اعلیٰ تعلیم کے حصول میں سہولت فراہم کرنے کے لیے پاکستان بیت المال اور فاٹا یونیورسٹی کے درمیان اہم پیش رفت ہوئی ہے۔

دونوں اداروں نے مالی مشکلات سے دوچار 50 طلبہ کو تعلیمی وظائف دینے پر اتفاق کیا ہے، جس کا مقصد انہیں تعلیمی سلسلہ جاری رکھنے میں مدد فراہم کرنا ہے۔تفصیلات کے مطابق پاکستان بیت المال خیبر پختونخوا کے ڈائریکٹر ڈاکٹر لعل بادشاہ نے فاٹا یونیورسٹی کے وائس چانسلر پروفیسر ڈاکٹر محسن نواز سے ملاقات کی۔ اس موقع پر مستحق طلبہ کے تعلیمی اخراجات پورے کرنے اور انہیں مالی معاونت فراہم کرنے کے مختلف پہلوؤں پر تبادلہ خیال کیا گیا۔ملاقات میں فیصلہ کیا گیا کہ اس تعاون کو عملی شکل دینے کے لیے دونوں ادارے جلد مفاہمتی یادداشت پر دستخط کریں گے۔ مجوزہ منصوبے کے تحت 50 ایسے طلبہ کو وظائف فراہم کیے جائیں گے جو مالی مشکلات کے باعث اپنی تعلیم جاری رکھنے میں دشواری کا سامنا کر رہے ہیں۔وائس چانسلر پروفیسر ڈاکٹر محسن نواز نے اس موقع پر کہا کہ مالی وسائل کی کمی کسی بھی مستحق طالب علم کی تعلیم میں رکاوٹ نہیں بننی چاہیے۔

انہوں نے طلبہ کی فلاح و بہبود کے لیے پاکستان بیت المال کی کوششوں کو قابلِ تحسین قرار دیتے ہوئے توقع ظاہر کی کہ اس تعاون سے طلبہ کو تعلیمی اخراجات برداشت کرنے میں نمایاں مدد ملے گی۔پاکستان بیت المال اور فاٹا یونیورسٹی کے درمیان طے پانے والا یہ مجوزہ تعاون مالی طور پر کمزور طلبہ کے لیے اعلیٰ تعلیم تک رسائی آسان بنانے کی جانب ایک اہم قدم ہے۔ وظائف کی فراہمی سے مستحق طلبہ کو درپیش مالی مشکلات کم کرنے اور ان کی تعلیم کا سلسلہ برقرار رکھنے میں مدد ملنے کی امید ہے۔