اسلام آباد (نیوز ڈیسک) مشرقِ وسطیٰ میں تیل کی ترسیل میں ممکنہ رکاوٹوں کے خدشات نے عالمی منڈی میں خام تیل کے نرخوں میں اضافہ کردیا ہے۔
بحیرۂ احمر میں تجارتی بحری جہازوں کو لاحق خطرات اور سعودی عرب میں تیل کی تنصیبات کو ممکنہ خطرات کے باعث عالمی سرمایہ کاروں اور تاجروں میں بے چینی پائی جاتی ہے۔مارکیٹ میں ہونے والی تازہ تبدیلیوں کے مطابق برینٹ خام تیل کی قیمت ایک ڈالر 21 سینٹ بڑھنے کے بعد 110 ڈالر فی بیرل ہوگئی ہے۔
اسی طرح امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کے نرخوں میں بھی ایک ڈالر سے زیادہ اضافہ دیکھا گیا، جس کے بعد اس کی قیمت 99 ڈالر فی بیرل کی سطح پر پہنچ گئی۔مشرقِ وسطیٰ میں سکیورٹی کی صورتحال اور تیل کی ترسیل متاثر ہونے کے خدشات عالمی منڈی میں قیمتوں کے اتار چڑھاؤ کی اہم وجوہات میں شامل ہیں۔
