اسلام آباد (نیوز ڈیسک): حکومت نے پیٹرول اور ہائی اسپیڈ ڈیزل کی قیمتوں میں اضافے کے ساتھ مٹی کے تیل کی قیمت بھی نمایاں طور پر بڑھا دی ہے۔

اس حوالے سے اوگرا نے نئی قیمتوں کا باضابطہ نوٹیفکیشن جاری کر دیا ہے۔ نوٹیفکیشن کے مطابق مٹی کے تیل کی قیمت میں 34 روپے 33 پیسے فی لیٹر اضافہ کیا گیا ہے، جس کے بعد اس کی نئی قیمت 276 روپے 66 پیسے فی لیٹر مقرر کر دی گئی ہے۔ اس سے پہلے مٹی کا تیل 242 روپے 33 پیسے فی لیٹر میں دستیاب تھا۔

دوسری جانب پیٹرول کی قیمت میں 5 روپے 44 پیسے فی لیٹر اضافہ کیا گیا ہے، جس کے بعد نئی قیمت 316 روپے 15 پیسے فی لیٹر ہو گئی ہے۔

اسی طرح ہائی اسپیڈ ڈیزل بھی 31 روپے 5 پیسے فی لیٹر مہنگا کر دیا گیا ہے، جس کے بعد اس کی نئی قیمت 354 روپے 35 پیسے فی لیٹر مقرر کی گئی ہے۔

اوگرا کے مطابق پیٹرولیم مصنوعات کی یہ نئی قیمتیں 18 جولائی سے نافذ ہو چکی ہیں اور 20 جولائی تک مؤثر رہیں گی۔ حکومت کی جانب سے حال ہی میں اعلان کیا گیا ہے کہ آئندہ پیٹرولیم مصنوعات کی قیمتوں کا تعین روزانہ کی بنیاد پر کیا جائے گا تاکہ عالمی منڈی میں ہونے والی تبدیلیوں کے مطابق فوری ردعمل دیا جا سکے۔