اسلام آباد — چیئرمین فیڈرل بورڈ آف ریونیو (ایف بی آر) راشد محمود لنگڑیال نے اعلان کیا ہے کہ وزیراعظم شہباز شریف نے تنخواہ دار طبقے کے لیے ٹیکس کی شرح کم کرنے کی ہدایت دے دی ہے، اور آئندہ مالی سال کے بجٹ میں اس ضمن میں اقدامات کا آغاز کر دیا گیا ہے۔پاکستان بزنس کونسل کے سیمینار سے خطاب میں چیئرمین ایف بی آر نے کہا کہ وزیراعظم نے بڑی کمپنیوں پر عائد سپر ٹیکس میں کمی کی بھی ہدایت دی ہے، اور اس پر عمل درآمد کے لیے حکومتی سطح پر مشاورت شروع ہو چکی ہے۔ انہوں نے مزید کہا کہ وفاقی حکومت بڑی کمپنیوں اور کاروبار پر سپر ٹیکس کو مرحلہ وار کم کرنے اور بالآخر ختم کرنے پر غور کر رہی ہے۔
راشد محمود لنگڑیال نے واضح کیا کہ سپر ٹیکس میں ممکنہ کمی یا خاتمے کے حوالے سے آئی ایم ایف کے ساتھ بھی بات چیت کی جائے گی، اور اس کا مقصد ملک میں سرمایہ کاری کو فروغ دینا ہے۔ انہوں نے یہ بھی کہا کہ ٹیکس کی شرح میں کمی کا انحصار براہِ راست ٹیکس دہندگان کی تعداد اور ٹیکس کمپلائنس پر ہوگا، یعنی جتنے زیادہ لوگ ٹیکس دیں گے، اتنی ہی شرح کم کی جا سکے گی۔ذرائع کے مطابق آئندہ مالی سال کے بجٹ میں سپر ٹیکس میں کمی کا پہلا مرحلہ متوقع ہے۔
