کراچی(این این آئی)وفاقی بورڈ آف ریونیو (ایف بی آر)نے کراچی میں تعمیر شدہ پراپرٹی کے لیے ریلیف کا نوٹیفکیشن جاری کر دیا ہے۔نوٹیفکیشن کے تحت رہائشی اور کمرشل پراپرٹی کے مختلف کیٹیگریز کے لیے ویلیو کم کرنے کا اعلان کیا گیا ہے۔نوٹیفکیشن کے مطابق 5 سے 10 سال پرانے رہائشی گھروں کے تعمیر شدہ حصے کی ویلیو 5 فیصد کم تصور کی جائے گی، جبکہ 10 سے 15 سال پرانے گھروں کے تعمیر شدہ حصے کی ویلیو 7.5 فیصد کم کی جائے گی۔

رہائشی فلیٹس کے حوالے سے بھی ویلیو کم کرنے کا فیصلہ کیا گیا ہے۔ 5 سے 10 سال پرانے فلیٹ کی ویلیو 10 فیصد کم، 10 سے 15 سال پرانے فلیٹ کی ویلیو 20 فیصد کم، اور 20 سے 30 سال پرانے فلیٹ کی ویلیو 30 فیصد کم تصور کی جائے گی۔ 30 سال سے زائد پرانے فلیٹس کی ویلیو 50 فیصد کم کرنے کا فیصلہ کیا گیا ہے۔کمرشل پراپرٹی کے حوالے سے بھی ریلیف دیا گیا ہے۔ 10 سے 15 سال پرانی کمرشل پراپرٹی کی ویلیو 5 فیصد کم، 15 سے 25 سال پرانی کمرشل پراپرٹی کی ویلیو 8 فیصد کم، اور 25 سال سے زائد پرانی کمرشل پراپرٹی کی ویلیو 10 فیصد کم تصور کی جائے گی۔اس کے علاوہ ایف بی آر کے نوٹیفکیشن کے مطابق کراچی کے ڈیفنس میں واقع کمرشل پراپرٹی کی ویلیو 15 فیصد زیادہ تصور کی جائے گی۔