لاہور ( این این آئی) پاکستان ریلویز نے چھ ماہ میں 46ارب روپے کما لیے، یہ آمدن پچھلے سال کے اسی دورانیے کی آمدن سے پانچ ارب روپے زیادہ ہے۔ اس حوالے سے سی ای او ریلوے عامر علی بلوچ نے بتایا کہ ریلوے نے مسافر ٹرینوں سے 24ارب روپے کمائے،مال گاڑیوں سے 16ارب روپے کی آمدن ہوئی، لینڈ، کوچنگ و دیگر ذرائع سے 6ارب ریونیو حاصل ہوا۔ انہوں نے کہا کہ ریکارڈ آمدن ریلوے کی درست سمت کو ظاہر کر رہی ہے، 2025ء ریلوے کے لئے تبدیلی کا سال ثابت ہو گا۔عامر بلوچ نے کہا کہ مارچ تک کراچی کے لئے نئی ٹرین چلانے کا وعدہ پورا کریں گے۔