واشنگٹن (این این آئی)وزیر خزانہ محمد اورنگزیب نے انکشاف کیا ہے کہ نئے قرض پروگرام پر مذاکرات کے لیے عالمی مالیاتی ادارے (آئی ایم ایف) کی ٹیم مئی کے وسط تک پاکستان کا دورہ کرنے کا امکان ہے۔میڈیارپورٹ کے مطابق وزیرخزانہ کا امریکا کے شہر واشنگٹن میں ایک ہفتے طویل دورے کا اختتام ہوگیا ہے۔

دورے کے اختتام پر گزشتہ روز امریکا اور پاکستانی میڈیا سے بات کرتے ہوئے محمد اورنگزیب نے کہا کہ نئے پروگرام کی تفصیلات بعد میں واضح ہو جائیں گی، ہم مئی کے وسط میں پروگرام کی تفصیلات پر بات چیت شروع کریں گے۔پاکستانی سفارتخانے میں گفتگو میں محمد اورنگزیب نے امید ظاہر کی کہ آئی ایم ایف کا بورڈ آف گورنرز رواں ماہ کے آخر تک موجودہ پروگرام کے آخری حصے پر بات چیت کریں گے، جس کے بعد حتمی قسط جلد ہی جاری کر دی جائے گی۔

رپورٹ کے مطابق پاکستان آئی ایم ایف سے 6 سے 8 ارب ڈالرز تک کا نیا قرضہ پیکیج مانگ رہا ہے، ماضی کے بیانات میں وزیر خزانہ نے کہہ چکے ہیں کہ پاکستان ایک طویل مدتی، تین سالہ، پروگرام کو ترجیح دے گا تاہم جب گزشتہ روز بریفنگ کے دوران سوال کیا گیا تو محمد اورنگزیب نے کہا کہ وہ اس وقت پروگرام کے سائز یا مدت کے بارے میں کوئی قیاس آرائیاں نہیں کریں گے۔