اسلام آباد (نیوز ڈیسک) قومی اسمبلی میں وزارت صنعت و پیداوار کی جانب سے بتایا گیا کہ تحریک انصاف کی حکومت نے گاڑیوں کے مزید گیارہ پلانٹ لگانے کی اجازت دی ہے جس سے ملک میں ایک ارب ڈالر سے زائد کی سرمایہ کاری آئے گی، گاڑیوں کی پیداوار کی شرح میں بتدریج بہتری آرہی ہے،

عوام کو نئے پلانٹس سے بہتر اور معیاری گاڑیاں حاصل ہوں گی اور پہلے سے موجود چند کمپنیوں کی اجارہ داری کا بھی خاتمہ ہوگا۔ قومی اسمبلی میں وقفہ سوالات کے دوران شیخ فیاض الدین کے سوال کے جواب میں پارلیمانی سیکرٹری عالیہ حمزہ ملک نے کہا کہ گزشتہ پانچ سالوں کے دوران حکومت میں صرف ایک آٹو موبائل پلانٹ لگا ہے۔ ہم نے گیارہ پلانٹ لگانے کی اجازت دی ہے اور اس سے ایک ارب ڈالر کی سرمایہ کاری آئے گی۔ دسمبر 2019ء میں 9 فیصد اس شعبہ میں نمو میں اضافہ ہوا ہے۔ ہنڈا کی پیداوار میں 120 فیصد اور انڈس موٹر کی پیداوار میں 72 فیصد اضافہ ہوا ہے۔ انہوں نے کہا کہ آٹو موبائل کا اچھا وقت آرہا ہے۔ ہنڈا سمیت صرف تین کمپنیوں کی اجارہ داری تھی اب یہ ختم ہو رہی ہے۔ اب لوگوں کو معیاری گاڑیاں ملیں گی۔ نفیسہ عنایت اللہ ملک کے سوال کا جواب دیتے ہوئے پارلیمانی سیکرٹری عالیہ حمزہ ملک نے بتایا کہ یونائیٹڈ موٹر،ایگل موٹر، کیا، ہنڈائی اور دیگر کئی کمپنیوں کو پلانٹ لگانے کی اجازت دی گئی ہے۔