اسلام آباد(آن لائن)ہنڈائی نشاط موٹرز (پرائیویٹ) لمیٹڈ ( ایچ این ایم پی ایل) نے فیصل آباد انڈسٹریل اسٹیٹ مینجمنٹ کمپنی (ایف آئی ای ڈی ایم سی) کے ایم تھری صنعتی زون میں گاڑیوں کی باقاعدہ پیداوار شروع کر دی ہے۔ ایچ ایم پی ایل نے 2سال کی قلیل مدت میں اسمبلی پلانٹ کی تعمیر کاکام مکمل کر لیا ہے۔ہنڈائی نشاط موٹر(پرائیویٹ) لمیٹڈ کے چیف آپریٹنگ آفیسر ٹیٹسو اسٹیو نے کہا ہے کہ

دسمبر 2017ء  میں اسمبلی پلانٹ کی تعمیر کا سنگ بنیاد رکھاگیا تھا جو مکمل کر لیا گیا ہے۔ ابتدائی طور پر اسمبلی پلانٹ کی پیداواری استعداد 15 ہزار یونٹس سالانہ ہے جس میں مزید اضافہ کیا جائے گا۔ انہوں نے کہا کہ ایف آئی ای ڈی ایم سی میں کمپنی کے نئے پیداواری پلانٹ سے پاکستان ہنڈائی گاڑیوں کی تیاری ” میک ان پاکستان” کے بینر تلے تیارکی جارہی ہے۔انہوں نے مزید کہا کہ کمپنی نے پک اپ ایچ۔ 100 پورٹر گاڑیوں کی پیداوار کا باقاعدہ آغاز کردیا ہے جبکہ مستقبل قریب میں مزید کئی ماڈلز کی گاڑیاں تیار کی جائیں گی۔ سی او اونے کہا کہ پاکستان میں ہنڈائی گاڑیوں کے پیداواری عمل کے آغاز پر ہم فخر محسوس کرتے ہیں جس سے ہم پاکستان میں ٹرانسپورٹ کے شعبہ کی ضروریات کی تکمیل میں اپنا بھر پور کردار ادا کریں گے۔ انہوں نے کہاکہ ہنڈائی اپنی جدید ترین گاڑیوں کے نئے ماڈلز مقامی طور پر تیارکرے گی۔ انہوں نے کہا کہ ہم مستقبل میں پاکستان میں تیار کی جانے والی گاڑیوں کو اپنے عالمی نیٹ ورک کا حصہ بھی بنائیں گے۔