کراچی(این این آئی)تاریخ میں پہلی بار حکومتی بانڈز میں غیر ملکی سرمایہ کاری ایک ارب 40 کروڑ ڈالر تک پہنچ گئی۔ بیرونی سرمایہ کاروں کا پاکستان کی معیشت پر بھرپور اعتماد کیا جا رہا ہے ، حکومتی طویل اور قلیل مدتی بانڈز میں سرمایہ کاری ریکارڈ سطح کو چھو گئی۔ مرکزی بینک کے اعداد و شمار کے مطابق رواں مالی سال کے پہلے چھ ماہ میں ٹی بلز اور پاکستان انوسٹمنٹ بانڈز میں سرمایہ کاری ایک ارب 40 کروڑ ڈالر تک پہنچ چکی ہے ۔

اس عرصے میں امریکہ سے 66 کروڑ ڈالر، برطانیہ سے 75 کروڑ ڈالر اور عرب امارات سے 7 کروڑ ڈالر کی حکومتی بانڈز میں سرمایہ کاری ہوئی۔معاشی تجزیہ کاروں کے مطابق آئی ایم ایف، ورلڈ بینک، ایشیائی ترقیاتی بینک اور دیگر کا پاکستان کی معیشت پر اعتماد بڑھا ہے ۔ماہرین کے مطابق زائد شرح سود کے باعث بھی بیرونی سرمایہ کار حکومتی بانڈز میں سرمایہ کاری کررہے ہیں،مگر بانڈز کی مدت میعادپوری ہونے کی صورت میں روپے پر دبابڑھ سکتا ہے ۔