لاہور ( این این آئی،مانیٹرنگ ڈیسک) پاکستان فلور ملز ایسوسی ایشن نے آٹے کے 20 کلو کے تھیلے کی قیمت میں 5 روپے کے اضافے کا عندیہ دیدیا، قیمت میں اضافہ کے لئے ایسوسی ایشن کی ایگزیکٹیو کمیٹی کا اجلاس سوموار کو طلب کر لیا گیا۔

تفصیلات کے مطابق پاکستان فلور ملز ایسوسی ایشن نے بھی آٹے کی قیمت میں اضافے کی تیاری کر لی ہے ۔ اس حوالے سے پاکستان فلور ملز ایسوسی ایشن کے گروپ لیڈر عاصم رضا نے کہا کہ پٹرولیم مصنوعات کی قیمتوں میں اضافے کے باعث آٹے کے 20 کلو کے تھیلے کی قیمت میں پانچ روپے کا اضافہ کرنے جا رہے ہیں کیونکہ فلور ملیں گوداموں سے گندم اٹھاتی ہیں اور پھر آٹے کی صورت میں دکانوں پر پہنچاتی ہیں جس کے باعث اخراجات میں اضافہ ہو رہا ہے جبکہ ماضی میں بھی ایسوسی ایشن نے پٹرولیم مصنوعات کی قیمتوں میں اضافے کے باوجود آٹے کی قیمتوں میں اضافہ نہیں کیا تھا لیکن اب آٹے کی قیمت میں اضافہ ناگزیر ہے۔انہوں نے کہا کہ آٹے کی قیمت میں اضافے کے حوالے سے ایسوسی ایشن کی ایگزیکٹو کمیٹی کا اجلاس پیر کے روز طلب کر لیا گیا ہے جس میں قیمت میں اضافے کی حتمی منظوری دی جائے گی۔واضح رہے کہ اس سے پہلے پٹرولیم مصنوعات، ایل پی جی ،یوٹیلٹی سٹورز پر دالوں اور چاولوں کی قیمتوں  میں بھی اضافہ کردیاگیا تھا۔

موضوعات:آٹا مہنگا