لاہور(این این آئی) ایران پاک فیڈڑیشن آف کلچراینڈ ٹریڈ کے صدر خواجہ حبیب الرحمان کی قیادت میں وفد نے ایرانی سفیر مہدی ہنر دوست سے ملاقات کی ۔اس موقع پر ضیاء الرحمان، بلال چشتی اور خواجہ عثمان بھی موجود تھے۔ خواجہ حبیب الرحمان نے بینکنگ چینل کے عدم بحالی کو
دوطرفہ اقتصادی روابط کے فروغ میں بڑی رکاوٹ قرار دیتے ہوئے کہا کہ خطے کی خوشحالی کیلئے پاک ایران تجارت کا فروغ دقت کی ضرورت ہے ۔ انہوں نے کہا کہ پاک ایران تجارتی حجم 1.5 ارب ڈالر تک پہنچ گیا ہے ، تجارتی روابطہ کی توسیع کیلئے سرحدی صو بوں کے درمیان تعاون کو فروغ دینا کی ضرورت ہے ، آئی پی منصوبے کے ذریعے دونوں ممالک کے عوام کے درمیان تعلقات کو مزید مضبوط بنایا جاسکتا ہے، حکومت، ایران سے قدرتی گیس کو سستے داموں میں خرید کرکے ملکی معیشت کو بہتر بناسکتی ہے۔ انہوں نے کہا کہ ایران اور پاکستان تجارت اور معاشی سرگرمیوں کے ذریعے مشترکہ ضروریات کو پورا کریں،باہمی تجارتی روابط کا فروغ نہ ہونے کی اصل وجہ دونوں ممالک کی مارکیٹوں کو ایک دوسرے کی معلومات پر عدم رسائی ہے۔انہوں نے کہا کہ بہت سے پاکستانی تاجر ایران کے ساتھ تجارت کرنا چاہتے ہیں لیکن ہمارے پاس ایران کی بازاروں کے بارے میں معلومات نہ ہونے کے برابر ہیں، دونوں ہمسایہ ممالک کی تاجر برادری ایک دوسرے کی صلاحیتوں اور مواقعوں سے بخوبی اگاہ ہیں لیکن اس حوالے سے ایک دوسرے کی مارکیٹوں کے بارے میں آگاہی کی کمی بھی ہے۔وفد نے ایرانی سفیر کو دو طرفہ تعلقات اور تجارت کے فروغ کیلئے کردار ادا کر نے پر شیلڈ بھی پیش کی۔
