لاہور( این این آئی)آل پاکستان انجمن تاجران کے صدراشرف بھٹی نے باقاعدگی سے ٹیکسز کی ادائیگی کرنے والے تاجروں کو یوٹیلٹی بلز میں چھوٹ اور خصوصی مراعات دینے کا مطالبہ کرتے ہوئے کہا ہے کہ معیشت کیلئے ریڑھ کی ہڈی قرار دئیے جانے والے تاجر طبقے کو ہر دور میں نظر انداز کیا گیا ،حکومت مجموعی قومی آمدن میں اضافے اورمعیشت کی ترقی کیلئے پالیسیوں کی تشکیل میں تمام
اسٹیک ہولڈرز کو بھی شامل کرے ۔ان خیالات کا اظہار انہوں نے اپنے دفتر میں ملاقات کیلئے آنے والے تاجروں کے نمائندہ وفد سے ملاقات میں گفتگو کرتے ہوئے کیا ۔ اس موقع پر مارکیٹوں میں تجاوزات ، بجلی اور ٹیلی فون کی لٹکتی ہوئی تاروں سمیت دیگر مسائل کے حوالے سے تفصیلی تبادلہ خیال کیا گیا ۔ اشرف بھٹی نے کہا کہ تاجروں نے نا مساعد حالات کے باوجود ملکی معیشت کی مضبوطی کیلئے اپنا اہم کردار ادا کیا ہے اور کرتے رہیں گے ۔جبکہ اس کے برعکس حکومتی اداروں کی جانب سے تاجروں کو درپیش مسائل کے حل کیلئے کوئی کردار ادا نہیں کیا جاتا۔ انہوں نے کہا کہ تاجرروزگار کی فراہمی کے ساتھ بھاری یوٹیلٹی بلز اور ٹیکسز کی ادائیگی بھی کر رہے ہیں ۔ ہمارا مطالبہ ہے کہ باقاعدگی سے ٹیکسز کی ادائیگی کرنے والے تاجروں کو یوٹیلٹی بلز میں چھوٹ اور خصوصی مراعات دی جائیں جس سے زیاد ہ سے زیادہ لوگ ٹیکس نیٹ میں آئیں گے ۔ انہوں نے کہا کہ تاجروں کو درپیش مسائل اور بہتری کیلئے تجاویز پر مشتمل ڈرافٹ تیار کیا جارہا ہے جسے متعلقہ وزارت کو پیش کیا جائے گا ۔
